Amy Kitcher — Cynaliadwyedd

Mae Amy wedi ymrwymo i leihau effaith amgylcheddol y wefan hon ac i adrodd yn agored ac yn gywir ar ôl troed carbon amcangyfrifedig y wefan.

Cwmpas y datganiad hwn

Mae’r datganiad hwn yn ymdrin ag allyriadau gweithredol amcangyfrifedig amykitcher.com: yr allyriadau sy’n gysylltiedig â’r ynni a ddefnyddir i weini tudalennau’r wefan ac i’w llwytho ar ddyfais ymwelydd. Nid yw’n cynnwys yr allyriadau sy’n deillio o adeiladu’r wefan nac o’r offer a’r gwasanaethau y mae Amy yn eu defnyddio yn ei gwaith ehangach.

Gwe-letya

Gwefan statig yw hon, wedi’i lletya ar Cloudflare Pages. Mae Cloudflare wedi’i restru fel darparwr gwyrdd yng nghyfeiriadur y Green Web Foundation (yn Saesneg yn unig). Mae’r rhestriad hwnnw’n adlewyrchu tystiolaeth a gyflwynwyd gan y darparwr am ffynonellau ei ynni, yn hytrach nag archwiliad annibynnol ohonynt.

Fel defnyddiwr ymwybodol, ysgrifennodd Amy at dîm Impact Cloudflare ar 4 Medi 2026 gyda chyfres o gwestiynau yn deillio o Adroddiad Effaith 2025 a Rhestr Allyriadau 2024 y cwmni. Roedd y cwestiynau’n ymwneud â chyfansoddiad portffolio gwrthbwyso hanesyddol y cwmni; sut y rhennir ei broses o baru ei ddefnydd o ynni ag ynni adnewyddadwy rhwng cytundebau prynu pŵer a thystysgrifau heb eu bwndelu; eithrio trydan cyfleusterau cydleoli a dŵr oeri o’i ffin adrodd; a statws ei ymrwymiad i’r fenter Targedau Seiliedig ar Wyddoniaeth. Mae testun llawn ei llythyr wedi’i gyhoeddi yma: Llythyr at Cloudflare (yn Saesneg yn unig). Mae croeso i berchnogion gwefannau sydd am ofyn cwestiynau tebyg i’w darparwyr lletya eu hunain ailddefnyddio’r llythyr.

Dylunio cynaliadwy

Mae’r wefan yn cynnwys tudalennau statig ysgafn wedi’u hadeiladu â HTML a CSS syml. Nid yw’n defnyddio dadansoddeg, sgriptiau tracio, teclynnau cyfryngau cymdeithasol, ffontiau allanol nac ategion.

Caiff delweddau eu gweini ar ffurf WebP a’u newid i’r maint priodol, a chaiff priodoleddau lled ac uchder penodol eu gosod arnynt. Mae’r rhan fwyaf o’r delweddau’n cael eu llwytho’n ddiog. Yn lle hynny, caiff dwy ddelwedd sydd i’w gweld cyn sgrolio eu llwytho ar unwaith, gan fod eu gweld yn syth yn rhan o’r argraff gyntaf y bwriedir i’r dudalen ei chreu.

Mae’r ffontiau’n cael eu lletya ar y wefan ei hun, ac mae pob animeiddiad yn parchu dewisiadau ymwelwyr o ran lleihau symudiad. Gyda’i gilydd, mae’r mesurau hyn yn lleihau trosglwyddo a phrosesu data diangen, gan ddiogelu cymeriad gweledol, hygyrchedd a defnyddioldeb y wefan.

Allyriadau carbon amcangyfrifedig

Ar hyn o bryd, nid oes modd mesur allyriadau gwefannau yn uniongyrchol â manwl gywirdeb llwyr. Mae cyfrifianellau carbon ar-lein yn cynhyrchu amcangyfrifon wedi’u modelu, ac mae eu canlyniadau’n amrywio yn ôl eu methodolegau a’u rhagdybiaethau.

Cynhaliwyd y ddau brawf isod ar 4 Medi 2026.

Rhoddodd Website Carbon Calculator (yn Saesneg yn unig) radd garbon B i’r wefan. Ar sail 10,000 o olygon tudalen y mis, amcangyfrifodd tua 13.91 kg CO₂e dros flwyddyn, sy’n cyfateb i oddeutu 0.116 g CO₂e fesul golwg tudalen. Mae’r gyfrifiannell yn defnyddio fersiwn 4 o’r Model Dylunio Gwe Cynaliadwy.

Rhoddodd Ecograder (yn Saesneg yn unig) radd gynaliadwyedd gyffredinol C i’r wefan. Sgôr gyfansawdd yw hon sy’n cwmpasu perfformiad, profiad defnyddwyr a gwe-letya gwyrdd ochr yn ochr ag allyriadau carbon amcangyfrifedig, yn hytrach na gradd garbon ar ei phen ei hun. Amcangyfrifodd Ecograder 0.46 g CO₂e fesul llwythiad tudalen, a fyddai’n golygu tua 55.2 kg dros flwyddyn ar sail 10,000 o lwythiadau tudalen y mis.

Ffigur enghreifftiol yw’r 10,000 o olygon tudalen y mis; nid traffig gwirioneddol y wefan hon ydyw. Bydd data am nifer gwirioneddol y golygon tudalen bob mis ar gael yn y diweddariad nesaf i’r datganiad hwn.

Mae un o’r amcangyfrifon carbon uchod tua phedair gwaith cymaint â’r llall. Mae’r gwahaniaeth hwn i’w ddisgwyl ac nid yw’r ddau ganlyniad yn gwrthddweud ei gilydd: mae Website Carbon Calculator yn defnyddio’r Model Dylunio Gwe Cynaliadwy, tra bo Ecograder yn defnyddio ei ddull sgorio ei hun, felly ni ellir cymharu’r ddau yn uniongyrchol. Mae’r gwahaniaeth yn ffordd ddefnyddiol o ddangos pam mai amcangyfrifon yw’r ffigurau hyn.

Mae’r ddau fodel hefyd yn gosod ffin o amgylch yr allyriadau y maent yn eu cyfrif. Nid yw’r naill na’r llall yn cynnwys yr ynni ychwanegol a ddefnyddir ar gyfer oeri, goleuo a throsi pŵer yn y cyfleusterau lle cedwir offer darparwyr lletya, sef un o’r materion a godwyd yn y llythyr uchod. Mae’r allyriadau gwirioneddol yn debygol o fod yn uwch na’r ddau amcangyfrif, yn hytrach nag yn is.

Amcangyfrifon wedi’u modelu yw’r rhain, nid mesuriadau uniongyrchol. Fe’u cynhwysir i roi syniad tryloyw o effaith debygol y wefan, yn hytrach na chyfrif carbon terfynol. Mae’r dolenni uchod yn arwain at offer byw a allai roi canlyniadau gwahanol dros amser.

Gwrthbwyso carbon

Mae Amy wedi prynu credydau carbon sy’n cyfateb i 0.83 tunnell o CO₂e drwy Offset Britain Ltd (wedi’i gofrestru yng Nghymru a Lloegr, rhif cwmni 05593179), ac mae’r credydau hynny wedi’u tynnu o gylchrediad o dan rif tystysgrif OB-SS-2026-001107. Gellir gwirio’r dystysgrif drwy dudalen ddilysu Offset Britain (yn Saesneg yn unig). Mae Offset Britain yn tynnu credydau o gylchrediad yn y gofrestrfa berthnasol ar ran y prynwr, fel na ellir eu defnyddio eto. Mae’r gwrthbwyso hwn wedi’i neilltuo ar gyfer y wefan hon yn unig, ac nid yw’n cael ei gyfrif yn erbyn unrhyw allyriadau eraill.

Ar sail amcangyfrif uwch Ecograder a’r ffigur enghreifftiol o 10,000 o olygon tudalen y mis, mae 0.83 tunnell tua phymtheg gwaith cymaint â’r allyriadau blynyddol a ragamcanir ar gyfer y wefan. Ar sail traffig gwirioneddol y wefan, mae’r ymyl yn sylweddol fwy. Prynwyd mwy o gredydau na’r angen yn fwriadol er mwyn caniatáu ar gyfer yr ansicrwydd yn yr amcangyfrifon sylfaenol a’r ynni ychwanegol a ddefnyddir gan gyfleusterau, nad yw’r modelau’n ei gynnwys.

Nid yw Amy wedi comisiynu asesiad annibynnol o allyriadau’r wefan nac wedi ceisio ardystiad annibynnol bod y wefan yn garbon niwtral. Felly, nid yw’n ei disgrifio fel gwefan garbon niwtral. Ar sail yr amcangyfrifon uchod, mae’n credu bod y gwrthbwyso a brynwyd yn fwy o lawer nag allyriadau tebygol y wefan dros y deuddeg mis sy’n dechrau ar ddyddiad y pryniant.

Nid yw gwrthbwyso yn cymryd lle lleihau allyriadau yn y ffynhonnell. Fe’i defnyddir yma ochr yn ochr â’r mesurau dylunio a ddisgrifir uchod, sydd â’r nod o gadw effaith sylfaenol y wefan yn isel.

Gwelliant parhaus

Bydd Amy yn profi’r wefan eto ac yn adolygu’r datganiad hwn o leiaf unwaith y flwyddyn, ac yn gynt os bydd unrhyw newid sylweddol i’w dyluniad neu ei chynnwys. Bydd yn parhau i chwilio am gyfleoedd i leihau trosglwyddo data a defnydd ynni heb amharu ar hygyrchedd, defnyddioldeb na phrofiad ymwelwyr.